Sammi讚安仔 做阿四一流

許志安日前表示要買過一批新內褲，鄭秀文（Sammi）叫他自己「搞掂」，還尷尬笑稱兩人的內衣褲是分開櫃桶放。但她不忘大讚安仔有愛心又勤力，打理家頭細務一流。

鄭秀文昨午在香港國際機場主持《SWAROVSKI閃亮聖誕樹》亮燈儀式，現場充滿節日氣氛，更引來大批旅客圍觀。大會送上一支紅色水晶咪給Sammi，她收到後興奮表示：「極喜歡，想馬上喺呢度開演唱會。」

提到下月正式開騷，Sammi坦言演唱會「飛債」仍然嚴重，她笑言：「我要飛冚飛，今次真係煲蓋的困惑，好彩有朋友肯幫手，答應cut飛。」Sammi又謂在努力操弗自己之餘也想起《激戰》張家輝，他有給予不少意見，Sammi發覺在思想和做人方面都很似家輝，不諱言每逢操練得好辛苦就會想起他。

拒幫男友買內褲

記者笑問為何不是想起許志安？Sammi笑謂：「其實佢都好好，成日陪我跑。最近傭人放大假九天，安仔包辦屋企所有家務，除咗學識用吸塵機，又帶貓狗去便便，佢好稱職。」

安仔早前穿着白色波褲跑步，成為狗仔隊的目標，他事後表示要買過一批深色波褲，甚至連內褲都要換埋。記者昨日提議Sammi不如買內褲獎勵安仔，她半信半疑表示：「係咪㗎，呢啲私人嘢要問番佢，有着內褲就得啦，我哋個櫃桶係分開㗎。」

此外，有指安仔送4000萬元豪宅給未來外母，Sammi聞言即場否定：「黐綫，我阿媽梗係唔會要，父母唔會收咁重禮，年紀老邁又唔識打理，父母內心快樂已足夠。」她又否認安仔買樓築愛巢，直言現在住得舒服，唔需要搬。

採訪：Pauline

編輯：陳禮恒

設計：梁政敏