葉問打到入昂坪 與遊客「比武」

秋高氣爽最適合郊遊，黛安早兩日就坐纜車入昂坪市集逛咗一圈。天公造美，搭纜車時黛安忍不住環迴360度拍照，親身體驗何謂「昂坪360」！別人不知還以為我是第一次來的遊客。

是日黛安是應昂坪360公司事務總管Vicky（劉淑儀）之邀，參觀今日才正式開幕的新景點「葉問體驗館」。話說電影《葉問3》就快上畫，據聞電影公司上次見到《捉妖記》入來昂坪宣傳反應好好，因此今次亦主動聯絡昂坪360傾合作。

今次電影公司除咗借出電影中甄子丹、泰臣、張晉同熊黛林着過嘅衫及兵器展出，仲特登以AR（擴增實境）技術，整咗個App畀遊客揸住手機四圍玩。其中喺葉問體驗館入面有幾個QR code，市民掃描條碼後就可同電影主角模擬對打合照，非常過癮。

打卡收集詠春招式

個App仲有個小遊戲，玩家到昂坪市集唔同地方打卡，就可集齊詠春108式入面失落的招式，既互動又好玩。

當日黛安除咗參觀新景點，仲去咗昂坪市集的動感影院，睇一部上映唔夠兩個月的5D電影《小飛蟻大冒險》。雖然係卡通，但在震椅、吹風及灑水等感官效果襯托下，感覺非常刺激。若你與小朋友同行，強烈推介你帶佢來睇。