祖兒建議紅館設張耀榮銅像

為紀念一代「演唱會之父」張耀榮，一連兩晚《演唱會之父榮耀紅館Show》前晚在紅館揭幕。耀榮叔生前曾為無數歌手舉辦演唱會，他出殯當日，靈車更特意在紅館停低送別。前晚，容祖兒提議在紅館設立耀榮叔的銅像以茲紀念。

張耀榮於今年三月心臟病發不幸離世，一大班歌手如張學友、容祖兒、陳慧琳、鄭秀文及葉蒨文等都紛紛現身紅館，以歌聲向耀榮叔作致敬。

容祖兒入行以來所舉行的演唱會，全部均由耀榮叔舉辦，二人可謂交情非淺。祖兒特別選唱《越唱越強》及《痛愛》，唱畢並向耀榮叔慣常就坐的位置輕輕鞠躬，她表示：「希望大家畀啲掌聲張生，多謝佢做咗一個平台，畀樂壇很多歌手演出，我由第一個演唱會到去年做第七個，都係張生喺行動、精神上100％支持。」

祖兒又建議在紅館後台設立耀榮叔的銅像，她稱自己沒資格去搞這件事，但總希望建議能得到實踐。提到去年個唱橫跨聖誕新年，即使大時大節，張生每晚都準時捧場。祖兒笑謂：「每次張生着乜都好，心口都會袋住幾疊飛，問大家夠唔夠飛。」祖兒在演出後表示：「今晚係用輕鬆心情懷念呢位前輩，佢本身個人好開心，能夠集合咁多唔同年代嘅歌手同台，令我好感動。」

欣宜黐餐要食鮑魚

「肥姐」沈殿霞生前與耀榮叔是好友，大家亦是住在同一棟樓。鄭欣宜在台上憶述說：「以前媽咪經常外出工作，我就會去張家食飯黐餐。張生好客氣，佢驚我怕醜，成日問我要唔要食多啲。當年只得六歲嘅我，竟然同張生講：『你求其畀鮑魚同蟹皇翅我食得㗎喇。』佢即刻笑到見牙唔見眼。」

撰文：Pauline

編輯：陳禮恒

設計：鄧俊明