王維基化身CS fb親覆客人投訴

數到最親力親為的老闆，「魔童」王維基肯定榜上有名！平時除咗要理公司發展同營運，最近仲化身客戶服務員（CS），上facebook解答顧客疑難。事緣魔童旗下購物頻道HKTV Mall舉行大型宣傳，以「區區大送禮」做噱頭吸引市民，唔同地方的居民網購滿一定金額，都有唔同贈品。

贈品臨時變蜜瓜

有網民為了份贈品，在送禮活動推出不久就落單支持，怎料落完單就一肚氣，並在個人facebook留言投訴HKTV Mall的贈品貨不對辨：「明明落單嗰下都仲顯示緊係咖啡機，轉頭埋咗單就變咗話送蜜瓜，去客戶服務問又話問相關部門然後等email覆我……」

王維基都「好嘢」呀，未夠40分鐘已經透過助手facebook回覆，網友唔信，隨即轉以個人帳號「Ricky Wong」現身，仲霸氣回應話，公司仲有好多部咖啡機剩，睇唔到問題喺邊；隔咗十幾分鐘就話自己要瞓覺，臨瞓前好有交帶話翌日會幫客人跟進，仲許下魔童的承諾：「如果你真係購物滿400蚊，我保證你會有一部免費的咖啡機。」原本好勞氣的網友聽見維基咁講，條氣即刻順晒，仲留言話：「好！真君子！欣賞你！」

一場公關危機迅即化為公關推廣。維基，你係得嘅！