去北京樓食填鴨 配Pinot Noir紅酒

大家都知黛安為食，最近美心一班老友叫埋黛安齊齊去北京樓，品嘗了一頓以鴨為主題的晚宴。一開始黛安以為，為北京填鴨選配酒，可能要揀中式烈酒，誰知選配紅酒一樣掂！

晚宴上仲見到，《晴報》社長麥華章、美心中菜及美心產品總經理李文賢（Martin）同ASC Fine Wines總經理馬慧能（Jonathan），幾位都是對美酒佳餚好有研究的人，一見面就非常好傾。今次晚宴仲特別搵嚟葡萄酒專欄作家劉信全（Stephen）講解酒的配搭，

Martin講起，用新西蘭Kim Crawford Pinot Noir 2013，配襯烤北京填鴨配，是期望用紅酒提升鴨宴菜式層次，結果當然無令人失望啦！

講番其餘菜式，除了北京填鴨，黛安最鍾意桂花糕伴凍鴨件同椒鹽小鴨腿，前者桂花味清新，配鴨肉剛剛好。至於椒鹽小鴨腿，惹味之餘，亮點是旁邊的點綴，驟看以為是紫菜，食落口細味才發現竟然是芥蘭葉！聽公關老友講，為了今次盛宴，大廚簡志鈞落足心機，由材料配搭到煮法都諗過度過，咬一口鴨腿，再食少少芥蘭葉，舌尖的芥蘭甜味，食到要豎起手指公！